Proverbs 2

Faida Za Hekima

1 ^aMwanangu, kama utayakubali maneno yangu
na kuyaweka akiba maagizo yangu ndani mwako,

2 ^bkutega sikio lako kwenye hekima
na kuweka moyo wako katika ufahamu,

3 ^cna kama ukiita busara
na kuita kwa sauti ufahamu,

4 ^dna kama utaitafuta kama fedha
na kuitafuta sana kama hazina iliyofichwa,

5 ^endipo utakapoelewa kumcha Bwana
na kupata maarifa ya Mungu.

6 ^fKwa maana Bwana hutoa hekima,
na kinywani mwake hutoka maarifa na ufahamu.

7 ^gAnahifadhi ushindi kwa ajili ya mwadilifu,
yeye ni ngao kwa wale wasio na lawama,

8 ^hkwa kuwa hulinda mwenendo wa mwenye haki
na kuhifadhi njia ya waaminifu wake.

9 ⁱNdipo utafahamu lipi lililo kweli na haki
na sawa: yaani kila njia nzuri.

10 ^jKwa maana hekima itaingia moyoni mwako,
nayo maarifa yataifurahisha nafsi yako.

11 ^kBusara itakuhifadhi
na ufahamu utakulinda.

12 ^lHekima itakuokoa kutoka njia za waovu,
kutoka kwa watu ambao maneno yao yamepotoka,

13 ^mwale waachao mapito yaliyonyooka
wakatembea katika njia za giza,

14 ⁿwale wapendao kutenda mabaya
na kufurahia upotovu wa ubaya,

15 ^oambao mapito yao yamepotoka
na ambao ni wapotovu katika njia zao.

16 ^pItakuokoa pia kutokana na mwanamke kahaba,
kutokana na mke aliyepotoka mwenye maneno
ya kushawishi kutenda ubaya,

17 ^qaliyemwacha mwenzi wa ujana wake
na kupuuza agano alilofanya mbele ya Mungu.

18 ^rKwa maana nyumba yake huelekea kwenye kifo
na mapito yake kwenye roho za waliokufa.

19 ^sHakuna yeyote aendaye kwake akarudi,
au kufikia mapito ya uzima.

20 ^tHivyo utatembea katika njia za watu wema
na kushikamana na mapito ya wenye haki.

21 ^uKwa maana wanyofu wataishi katika nchi,
nao wasio na lawama watabakia ndani yake.

22 ^vBali waovu watakatiliwa mbali kutoka nchi,
nao wasio waaminifu watang’olewa kutoka humo.